منتديات شهرزاد الادبية - عرض مشاركة واحدة

اوسمتي · 03-25-2019

____

***

مقبرة دجلة//الم العراق

ربطنة اسمج اوية الاموات
وكلمن فقد خلة يطلبج ثارة

كليلي بعد يادجلة شنسميج؟؟
دجلة سبايكر لو دجلة عبارة

اجمل ماملكنة بطلقتج ماتوا
هذا يامضيف الكتل خطارة

مثل ام الشهيد تروح يوم العيد
موتفرح تذب دموع هدارة

وانتي بعيد الاخضر لليفرحون
كلبتي الفرحة بيهم شد الوزارة

بعد نسكت لان عنوانة خرسان
واحنة اول جبان اليقبل بنارة

ولان خرسان كلشي يرهم ويانا
ولحمنة اشكد حلو مشابك الكنارة

يكصابين...
بسها بطونكم ماشبعت امن الموت
باجر في جهنم ناس وحجارة

اخذتوا فلوسنة والنفط والكيعان
واخذتوا احلى الشباب وزينة الحارة

وخربتوا البلد بمحاصصة غمان
وخليتوا حربنا الجار وي جارة

خزيتونة والله والحجي شيفيد
وياهو البالعراق اليسلم بدارة

العبوا بكيفكم وخل يزعل اليزعل
شعب كلة نثاية وانتم اكبارة

بس هي المراجل حدها يم عباس
اجيبة منين هسة وياخذ بثارة

عليكم عار كل اللي يموتون
الوطن مبخوت احسبوا احساب للشارة

واذكركم اباجر من تموتون
موت اللي مثلكم مالهم جارة

الوطن عنوان شامخ للتواريخ
اجيال الكبلنة نقلت اخبارة

مايرحم عدو دك للحرب بوق
ويكرم حيل شعبي بناس خطارة

بألمي والم العراق
اعزي نفسي اولا وثانيا وعاشرا
عامرالعراقي