ديوان شعر حصري** الشاعر عامر العراقي

اهداء خااص لمعذبتي
شابكها وتكلي اكرب علية

انا المجنون والمجنني هي
ملاك امن السما ونزلت علية

تدفيني بحضنهاوتغركني بوطنها
تعرف اني الها واعرفها الية

اشم من جوة اذنها العطر اشكال
واداعبها اذا وكعت بدية

الخدر بعيونها وي نار الانفاس
وشفايفها بحر يرويني مية

وحدر ركبتها يتمايل التفاح
اذا عضينة تصرخ للمنية

على اوسادتها تفرش احلى الورود
وتغطيني بحنان وجاذبية

انوثتها احتلال الكلشي حواء
وانا البركان يمها يثور بية

من ادني عليها اتهيج الجبال
اسكيها وترد عطشانة الية

وتحطني حطب يم عود شخاط
اوج ماانطفي واجويها هية

وشكد ماجويت اتكول اشاه
بردانة وترد اتلفها ادية

اشكد حلوة المحنة اوية المجانين
شابكها وتكلي اكرب علية

بقلمي
عامرالعراقي

. . قلم واوراق ...!! وخيال معتق وبقايا قلب ممزق تلك مخلفات حبك التي امتلكها الان لست غنيا بما فيه الكفاية فلم تورثني شيئاً ياحبيبي سوى الدموع سوى الدموع وها هي جفت من كثر نزفها خلفك حبيبتي...!! في ذات يوم من الايام كانت حبيبتي تجلس بجانبي كنا نتهامس العشق وكانت يدي على كتفها ورأسها منحني قليلا على صدري ويدي الاخرى ممدودة على رجلي وكانت تمارس لعبتها على خطوط كفي وجائت نسمة هواء داعبت خصلات شعرها فرمت ببعضهن على وجهي كانت تحاول سحب شعرها مني فمنعتها ومسكت يدها وحذرتها ان تفعلها ثانيا لاني اصبحت في ذروة مااحلم به واعلم انها لحظة العمر التي لن تتكرر فرفعت رأسها عني ونظرت الى عيوني وداعبها الهواء مرة اخرى فرمى بشعرها على وجهها فلمسته بسبباتي والوسطى وازحته عنها بهدوء فشعرت بانها تغفو وتقترب مني أكثر ارتجف قلبي ولعاً واقتربت منها...!! وارتمت بين احضاني ارتفع صوت انفاسنا وشفاهنا تكاد تتعانق رأيت خدودها وهي تحمر خجلا اسدلت جفونها وعم الصمت بيننا شممت رائحة الاحمر بشفاهها احسست ببرودة في كل انحاء جسدي وسلمت قوتي الى ضعفي واقتربت لأبادلها الشعور وحين لامست تلك الشفاه المرتجفة أأأأه...؟؟؟ رن منبه الساعة معلنا بداية الصباح ياخيبتي...!! كان حلماً ليتني لم اصحوا منه ولو لدقيقة اخرى ليتني بقيت احلم ليتني..!! ليتني..!! ليتني..!! بقلمي عامرالعراقي . .

بعد مارافك صديقي الباعني


الجنت اسامحهم كبل من مستحاي
مني ماخجلوا ويحجون بكفاي
ولان طيب كلبي اتحمل وضم
وحتى بالكونة اضمنهم وراي
ولان حاميهم يطعنوني غدر
عفية كصة الوشلت مابيها ماي
الثقة بالنفس خصلة وزحمة
احط الخصلة بالمو مستواي
بعد مارافك صديقي الباعني
ارضي نفسي وماادور بس رضاي
اني اداوي جروحهم وبكلبي نار
ومن عزتهم للاسف شحوا دواي
الله ليعوزني الهم زحمة من اخلاقي
انزل وانة المعلي بسماي
انكسرت وماثنيت وراسي فوكالعيب
عالوطالي راسة وماكدر يكسب رضاي
مدري ليش استحلوا الفشلة ورضوا
وتأقلموا عاللاشعور او لاابالي ولاسواي
اتكبروا مدري طغوا مدري غرور
المهم مهما يكن ضلوا وراي
وتعلمت منهم درس باللاشعور
ومن دستهم ماهيست اليم حذاي


بقلمي
عامر العراقي

مرايتي...بقلمي حصريا

اليحب يتعدة كل خطوط حمرة
ويحس بثلج وبأيدة جمرة
يسهر للينامون ويكتب للميقرون
وغنيهم من يحب تشوف فقرة
شفت بمرايتي ذبلانة العيون
محدب والوكت كاسرلة ظهرة
بالاول ماعرفتة هواي كبران
وعرفتة من بياض الصبغ شعرة
كتلة شبيك شو متغير هواي
ماردلي اضن خلصان عمرة
وكام يمتمت ويهذي بخرافات
وعرفت السالفة الكسرتلة ظهرة
الوفي من ينجرح للموت ميطيب
شيطيبة اذا بالكلب كسرة
وانة مرايتي بيها حجي هواي
مغطيها اريد الجرحي استرة
شستر موفضحني الشيب بالعين
لو بالراس جان اصبغ وغيرة
جان ارتاح من كل السؤالات
حتى بضحكتي يفسروها حسرة
اذا اتكلم يكولون مجنون
واذا اسكت الشامت سيفة نظرة
مذبوح انة كلشي محير وياي
لان ملوحتة بجروحي غزرة
طبع دلة انتجي اعلة الجمر مرتاح
ويدوروني رغم كهوتي المرة
عشت محبوب بين اللي يكرهون
واني اقرة بكلبهم نار صفرة
المهم ضحكولي ماهمني شيضمون
البشر بخلاقة مو بشكثر عمرة
وخانوني لان ماعدهم اخلاق
وساترهم لان اخلاقي سترة

بقلمي
عامرالعراقي

الوافي معجب بهذا

جف المسامح..بقلمي

جف المسامح كطعتة امن الجتاف

لايرف كلبي وامدنة بصلح


لان كل مامدة يمسح دمعتك

يرجعلي جفي وبي جرح


وانت تفرح لو يمربية الحزن

وفوك جرحي بيدك تحط الملح


صار كوم اسنين احبك ماحجيت

وبدقيقة تبيع حبي وينفضح


ياما خليت الصدر لجلك درع

وانت شوف بظهري زارع جم رمح


وياما دفيتك انة بحب وحنان

وانت كلمة عشك منك ماتصح


ثاري كاعك بور ابد ماتنزرع

مايخضر ورد يم كاع الملح


بعد يطلع منك هواية كلام

الاناء انت وبعد انضح نضح


هية قصة عشك خربت من زمان

وقصتي وياك ابد ماتنصلح


انت موتعرف انة بطبعي جبل

ليش تجرحني اذا بعدك سفح


ردت تلعب بية ومناطرني اطيح

شفتة شيسوي الجبل من ينبطح؟؟؟


بقلمي
الشاعر عامر العراقي

الوافي معجب بهذا

اشكد صعبة انتي


اشكد صعبة انتي واني اهواج
لان اقراج مابين الفراغات

ولان انتي بعيدة اشتاكلج دوم
وطول الليل اتحمل عذاباات

اشوفج في خيالي ويهدأ والبال
وارسمج في قصيدة وكلها قفشات

ضوة عيوني العمن من رحتي لليوم
كد ماراقبن بعد المسافات

على خيط الامل صبرت الانفاس
وعشت مخنوك حي بنص الامواات

هم باجر ترد وتكلي حنيت؟؟
هم تزلك جذب وبحضني اتبات

وارد اسمع همس والناس نيام
وخاف اعليك كل كلمة سلامات

بحلم عايش وكل احلامي انت
اخاف امن الحلم اصحى حرامات

احسك مو بحضني غير انجن
ولك كلي احبك انت حسبات

حسبة عيونك وحسبة سوالفك
طولك وشعرك حتى الاكلات

حتى العركة من تزعل وراضيك
حتى الغزل مالك بي ملذات

وانا نفسي دنية تشتهي الكاك
مثل عيوني ماتشبع بنظرات

منو مثلي يحبك قيسة بالعين
يشوف العيب ويغطي المعيبات

اليحب لو اعمى لو ميشوف
اقصد صعبة واني ابن المهمات

راح ابقى احبج لحد متلينين
حلوة الصعبة ماتشبه السهلات

وانا صاعد نخل كل البساتين
ماتصعب علي صعدة العيطات

اجمل ماشفت بعيوني من الكون
حبي بس الج مابدلة هيهات


عامر العراقي

الوافي معجب بهذا

هويتج وانه طالب علم بالشوك
وخفت من الرسوب وربعي يحجون
كالولي صعب حب عشرة النوك
كلت خلوني اجرب لا تعرضون
وانتي ما حسبتي بكلبي محروك
حسبتيني رقم وي اليرسبون

الله عليك اخي عامر
اشواقك امطار ربيعية
تنثرها بصحراء الحبيب
وتامل ان تعود حقولها بالعشق الوفير
ونتمنى لك ذلك مع المحبة الدائمة
والجوري لروحك العابقة بالمشاعر

ينسخ الموضوع مع التقدير

اكبال عيني..

اكبال عيني.. تمشي وتروح وتجي
وكاظ الساني الخجل مابية اصيح

احضن بخطوات جدمك من تمر
ومن بعيد يجيبلي عطرك الريح

اتلوة مدري شبية واتلعثم خجل
موش بلساني ذبح كلي ذبيح

ومرات وي روحي اناقش قصتك
واترادد اوياية اشوكت راح استريح

اشوكت راح احجي الصراحة
ويعرف بحبة انا كلش صريح

واعترفلة بعشكي وباليل السهر
ويرتاح بيه بداخلي المامستريح

كلب ام بداخلي خايف عليك
وخاف اخسرك خاف اضل بعدك جريح

كلب واحد عندي ماجرب يحب
ومابايح الغيرك حتى اعرف ابيح

انة سر الناس كلها تدري بي
ومامخلي احساسي عالفارغ يطيح

انت لو مابية عايش مااعيش
وخل اصير وياك هالمرة صريح

اني كلي اغلاط عايش بالغلط
ولان انت بداخلي عايش صحيح

بقلمي
عامرالعراقي

الوافي معجب بهذا

لتتجاهل مشاعر...

لتتجاهل مشاعر بس الك تنكال
الحب الحقيقي امن الكلب يطلع

وانة وكلبي مانختلف بالراي
صدرلي امر بس يمك واكطع

احس بروحي طاير من تمرني
وعسل طعمك بحلكي وانت مر ني
مثل جندي اوية ضابط من تمرني
انفذلك امر واخذ تحية
اموتن الف موتة وانتحية
كل لدغاتي منك وانت حية
وانسى الصار كلة من تمرني


بقلمي
عامر العراقي

الوافي معجب بهذا

عشرتهم مثل خشبة وبسامير

واتوسد جنح فراشة مكسور
لايرهم غطة ولايرهم يطير

وانة كلش تعبت بهاي دنياي
يوسف خووتة الذبوه بالبير

الحمى امن الرجل ماتجي امن بعيد
احتار واكل البالي لتحير

هذولة القربتهم ردهم ابعاد
ميفيدون مايحتاج تفسير

اللبالة بطن مايشبع اخلاق
طبع حيوان مايرهملة تغيير

يعض ايدك اذا مديتها هواي
واذا تندار ينبح عود تحذير

يعمي ابلا قدر هالناس اشباح
هم شايف شبح يرهملة تقدير

تعبت استنكي منهم وارد غلطان
وعشرتهم مثل خشبة وبسامير

مصالح لو طمع لو مايماشوك
واذا جيبك فرغ اقربهم يطير

لهنا وانتهت عشرة الوجهين
طز بالمثلهم واليصير يصير

اعيش الوحدي بس البال مرتااح
ولااندم على ذولة المكاسير


بقلمي
عامر العراقي

الوافي معجب بهذا